Oooopppsss!!!  Bago mo pa sabihing ready na naman ako para lumapang at lalong magpalaki ng katawan dahil fiesta, ay nagkakamali ka!  Hindi ito klase ng fiesta na may kainan kundi fiesta dahil for a week I can do anything I wish to do.  And this special day starts today.

Pero bakit nga ba fiesta?  Well, kasi para sa isang buong linggo, wala akong responsibilidad para sa iba.  Ang natatanging responsibilidad na kinakailangan kong harapin ay ang aking sarili.  Ang aking kakainin sa araw-araw… un lang!

So, ano nga bang meron at ang responsibilidad ko ay ang sarili ko lamang.  Well, dahil ang kasama ko sa bahay, maliban sa isang pinsan ko na nasa kolehiyo ay umalis para sa isang linggong bakasyon sa Disney World, Orlando, Fl.  Nakakainggit, subalit iniisip ko na lang na darating din ang pagkakataon ko para makarating doon.  Sa ngayon, susubukan ko munang magliwaliw at ikutin ang lugar na ito ng ako lamang at gagamit ng bus.  Sa sobrang kasabikan ay bumili na ako ng isang linggong bus pass.  Mas makakatipid kasi ako kung ganito ang gagawin ko.

Nagsimula ang fiestang ito kaninang umaga.  4am ng kami ay gumising upang ihatid ang mga tita sa paliparan.  Matapos iyon, ay pansamantala akong umuwi ng bahay habang naghihintay sa aking pinsan na makakasama ko ngayong araw na ito.  Di na ako nakatulog, bagkus ay naggawa ng Starbucks coffee at nag-init ng agahan.  Habang nakasalang ang aking agahan sa hurno ay pinag-trip-an ko ang aking buhok.  Nagandahan ako sa ayos ng buhok ni ‘Halle Berry’ sa pelikulang ‘Perfect Stranger’ kaya naman sinubukan ko itong gayahin.  Kaya naman isinalang ko ang curling iron at sinimulangitikwas ang aking buhok.  At kung hindi ba naman sa isa’t kalahating katangahan… sa kalagitnaan ng aking pag-aayos ay nahawakan ko ang mismong maiit na bahagi ng curling iron.  ‘Ouch!‘  yan ang katagang nais kong ihiyaw, laking pasasalamat ko na lamang at makapal na sa kalyo ang aking palad kaya hindi naman ito nalapnos. 

Ika-8 at kalahati ng umaga ng dumating ang aking pinsan… ng mga oras na ito, nakakaramdam na ako ng antok, salamat sa ‘Starbucks’ coffee na aking ginawa at kahit papaano ay nalalabanan ko ang antok na aking nararamdaman.  Sa kanyang pagdating ay isinuot ko lamang ang aking damit panlamig at isinusi ang pinto ng bahay bitbit ang mug ng ‘Tim Hortons’ na naglalaman ng ‘Starbucks’ coffee.

Ibinaba niya ako sa simbahan malapit sa kanyang tahanan sa Osborne.  Di siya makakasama sa pagsisimba bagamat iyon ang unang plano sapagkat hindi pa siya nakakabihis para sa ‘breakfast appointment‘ na aming pupuntahan.  Maayos ko namang natapos ang pagsisimba sa kabila ng pag-iisa.  Hah!  Ngayon ay nasubukan ko ng inumin ang ‘alak’ na sa Pinas ay tanging pari lamang ang umiinom.  Dito kasi, sa oras ng komunyon, ay hindi lamang ang ‘tinapay’ ang ibinabahagi kundi maging ang ‘alak’… bagamat meron kang option na wag inumin ang ‘alak’ .  Ahhh, napakasarap ng wine… parang nais ko ng laklakin ang laman ng buong ‘cup‘.

Matapos ang misa ay tinawagan ko ang aking pinsan upang sunduin na ako.  10:30am ang aming agahan sa Assiniboine.  Sa ‘Tavern at the Park’ kami kumain para sa isang brunch buffet, tunay namang napagkay sasarap ng pagkain.  Di ko na sana nais itanong pa kung magkano ang presyo ng aming kakainin.  Subalit sa di kalaunan ay nalaman ko na din dahil sa reaksyon ng asawa ni Arlyne,  isa sa kasama naman sa agahang iyon.  Kaya naman pala ang wika sa akin ng aking pinsan ay kumain akong mabuti… hahahahah!!!

Matapos ang brunch ay tumungo naman kami sa St. Vital upang maglibot sa mall, dangan kasi ay kinakailangang bumaba ang aming kinain.  Sobrang busog na busog talaga ako.  Pakiramdam ko ay sobrang bundat talaga ako at kahit ngayon ngang ikaanim na ng gabi ay di ko pa naiisip ang kumain o uminom man lang.  Bago tuluyang umalis ng Assiniboine ay nagpakuha ak ng larawan…  Subalit pambihirang camera, parang na-frozen na dahil ayaw gumana.  Naubusan ng baterya pala.  Salamat na lamang at nakakuha kahit papaano ng dalawang larawan, sana nga lamang ay naging maayos ito.

Pagdating sa St. Vital ay nag-ikot-ikot kami.  Nagtungo kami sa Disney Store at doon nga ay nakakita ako ng sale na palda na may kapirasong print ni Tinker Bell, at para akong musmos na super excited kaya naman binili ko na ito.  Sa pag-iikot ay nakakita din ang aking pinsan ng mapormang boots na kanyang binili.  At ng magtungo kami sa damitin ay nakakita din kami ng magagandang blusa.  Ibinili niya ako ng dalawa.  Matapos ito ay nagtungo naman kami sa Wal-Mart upang ibili niya ako ng yogurt(plano ko kasing may Activia challenge ngayong linggo na ito upang magbawas ng timbang)  di nga lamang Activia ang aming binili kundi Silhouete.  Ilang sandali pa ay nasa sasakyan na kaming muli at nagbiyahe pauwi. 

Hinatid na niya ako kaagad sa bahay dahil mahirap kung gagabihin masyado, may kalayuan din kasi ang aking tinitirhan sa bahay na kanyang tinutuluyan.  Pag-uwi sa bahay… excited kong isinukat ang aking biniling damit kaya naman todo sariling sikap akong nag-pose sa camera at eto nga ang resulta…

Ngayong gabi, muli akong nagpaplano… ano nga ba ang gagawin ko kinabukasan, tinawagan ko na ang aking kaibigan upang magkita… hahahahaha!!!  Bukas, ikalawang araw ng aking fiesta!!!